രണ്ടാഴ്ചയോളം ന്യൂയോര്‍ക്കില്‍ നിന്നുള്ള
ഒരു ഇരുപത്തിനാലുകാരിയുമായി
ഞാന്‍ ചുറ്റിക്കളിയിലായിരുന്നു-
തോട്ടിസമരം
നടന്നോണ്ടിരുന്നപ്പോള്‍.
അതിനിടയിലൊരു രാത്രിയില്‍
എന്‍റെ മുപ്പത്തിനാലുകാരി പെണ്ണുമ്പിള്ള
കയറി വരുന്നു,
അവള്‍ പറഞ്ഞു, “എനിക്കെന്റെ
എതിരാളിയെ കാണണം”
കാണുകേം ചെയ്തു.
“ഓ,നീയൊരു കൊച്ചുസുന്ദരിയാണല്ലോ”
പിന്നെ ഞാന്‍ കാണുന്നത്
കാട്ടുപൂച്ചകളുടെ ഉച്ചത്തിലുള്ള കാറലുകളാണ്
-എന്റമ്മോ, എന്തോരമറലും എന്തൊരു മാന്തിക്കീറലും,
മുറിവേറ്റ മൃഗങ്ങളുടെ
കരച്ചില്‍ ,
രക്തം ,മൂത്രം...
ഞാന്‍ ഫുള്‍വെള്ളത്തിലായിരുന്നു,
ട്രൌസര്‍ മാത്രമാണിട്ടിട്ടുള്ളത്. .
ഞാനൊന്നെടക്ക് കേറി
വേര്‍പെടുത്താന്‍ നോക്കി
നിലത്ത് വീണു , മുട്ടുളുക്കി .
പിന്നെയവറ്റ മറവാതിലും
കടന്നു നടവഴിയിലേക്കും
പിന്നെ തെരുവിലുമെത്തി.
നിറച്ചു പോലീസുകാരുമായി
പോലീസ്‌വണ്ടിയെത്തി .മോളില്‍
പോലിസ്‌ ഹെലികോപ്ടര്‍ വട്ടം ചുറ്റി.
ഞാന്‍ കുളിമുറിയില്‍
കണ്ണാടിയില്‍ നോക്കി പല്ലിളിച്ചു :
അന്‍പത്തഞ്ചാം വയസ്സില്‍ ഇത്ര
മനോഹരമായ സംഭവങ്ങള്‍
നടക്കുന്നത്
സര്‍വ സാധാരണ മല്ല.
വാട്ട്സ് കലാപത്തിനേക്കാള്‍ കേമം!
മുപ്പത്തിനാല് വയസ്സുകാരി
തിരിച്ചുള്ളില്‍ വന്നു.
അവളുടെ മേലാകെ
മൂത്രം,വസ്ത്രങ്ങളൊക്കെ
കീറിപ്പറിഞ്ഞ്.കൂടെ
രണ്ടു പോലീസുകാരും.അവര്‍ക്ക്
എന്താണ് നടന്നതെന്നറിയണം .
ട്രൌസറൊന്ന് വലിച്ചു കേറ്റി
ഞാന്‍ വിശദീകരിക്കാന്‍ ശ്രമിച്ചു .
[ചാള്‍സ് ബുകൊവ്സ്കി [1920-1994] ജര്‍മന്‍വംശജനായ അമേരിക്കന്‍ കവിയും നോവലിസ്റ്റും ]
No comments:
Post a Comment